वीरगन्ज,२८ फाल्गुन । वीरगन्ज नर्सिङ क्याम्पसमा नेविसंघको स्ववियु सभापति उम्मेदवार दियान्सु श्रेष्ठले चैत ५ मा स्ववियु निर्वाचनमा नेविसंघको जित सुनिश्चित रहेको बताएकी छन् ।
मधेसखबरसंगको कुराकानीमा श्रेष्ठले भनिन्,‘ विगतको निर्वाचनमा अनेरास्ववियुले जितेपनि विद्यार्थीको सुखदुखमा उनिहरु कहिल्यैपनि देखा परेनन् । मतलबपनि गरेनन् । हारेपनि नेविसंघले नै विद्यार्थीहरुको हकहितका लागि लड्दै आएको छ । त्यसका कारण यसपालिको निर्वाचनमा हाम्रो जित पक्का छ ।’
यसअघि अनेरास्ववियुबाट जितेको स्ववियुको निस्कृयताका कारण वीरगन्ज नर्सिङ क्याम्पसमा स्ववियु पनि छ र भन्ने अनुभूती विद्यार्थीहरुले गर्न नसकेको उनले बताइन् ।
क्याम्पसको ल्याबको अवस्था ठिक नरहेको , शौचालय दुरावस्थामा रहेको , कक्षाकोठा विद्यार्थी मैत्री नभएको ,छात्रावासमा खानाको शुल्कमा विद्यार्थीहरुलाइ विभेद गरिएको लगायतका समस्याहरु रहेको उनले बताइन् । क्याम्पसमा अहिले विभिन्न समस्याहरु रहेको भन्दै उनले ती समस्या अब नेविसंघ नेतृत्वकोे स्ववियुले सम्बोधन गराउने दाबीपनि गरिन् । ती समस्याको सम्बोधन क्याम्पस प्रशासनबाट हुन नसके नेविसंघले स्थानीय दाताहरुसंग समन्वय गरेर समस्या समाधान गराउने उनको दाबी थियो ।
चैत ५ मा हुने स्ववियु निर्वाचनका लागि वीरगन्ज नर्सिङ क्याम्पसमा नेविसंघ ,अनेरास्ववियु र अनेरास्ववियु (क्रान्तिकारी) गरी ३ संगठन चुनावी प्रतिस्पर्धामा छन् ।
