काठमाडौं,२८ फागुन । राष्ट्रिय स्वतन्त्र पार्टीकी सांसद सोबिता गौतमले सरकारको नियन्त्रणमुखी प्रवृत्तिप्रति कडा आपत्ति जनाउँदै लोकतन्त्रकै लागि सरकार नै खतरा बन्दै गएको टिप्पणी गरेकी छिन्।
संसद्को शून्य समयमा बोल्दै उनले सरकारको व्यवहार दमनमुखी बन्दै गएको र नयाँ आवाजलाई दबाउन खोजिएको आरोप लगाइन्। कानुनलाई प्रतिशोधको हतियारका रूपमा प्रयोग गरिँदैछ भन्दै उनले सरकारको नियतमाथि प्रश्न उठाइन्।
सांसद गौतमले सामाजिक सञ्जाल, सडक, संसद् जताततै सरकारले नियन्त्रण गर्न खोजेको आरोप लगाउँदै भनिन्,”सरकारले प्रश्न गर्ने सांसदलाई होच्याउने, पत्रकारको पास खोस्ने, निषेधाज्ञा लगाएर सडक कब्जा गर्न खोज्ने प्रवृत्ति देखाइरहेको छ। तर, सरकारले जनताको चेतना नियन्त्रण गर्न सक्दैन।”
उनले सबैको विचार अट्ने लोकतान्त्रिक व्यवहार गर्न सरकारलाई चेतावनी दिँदै भनेकी छिन्,
“नत्र परिणाम जनताको पक्षमा हुनेछ।”
सोबिता गौतमले सरकार निरन्तर संकटमा फसेको र जनताको विश्वास गुमाइसकेको दाबी गरिन्। सरकारको नीति र व्यवहार लोकतान्त्रिक मूल्य–मान्यताविरुद्ध जान थालेको भन्दै उनले सचेत गराइन् कि यदि यही प्रवृत्ति जारी रह्यो भने परिणाम सरकारका लागि गम्भीर हुन सक्छ।
