बुटवल,२८ फागुन । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले प्रतिगामी र प्रतिक्रियावादी शक्तिको षड्यन्त्रविरुद्ध लाखौँ जनता सडकमा उतारेर खबरदारी गरिने चेतावनी दिएका छन्। मगर राष्ट्रिय मुक्ति मोर्चा नेपालको छैटौँ राष्ट्रिय सम्मेलनलाई सम्बोधन गर्दै उनले वर्तमान सत्ता गठबन्धनभित्रका भ्रष्टाचार र विचौलियावादी प्रवृत्तिले जनतामा निराशा बढाइरहेको भन्दै सचेत गराए।
अध्यक्ष प्रचण्डका अनुसार, इतिहासबाट हटिसकेका प्रतिगामी तत्वहरू फेरि सक्रिय हुँदै संघीय लोकतान्त्रिक गणतन्त्रविरुद्ध षड्यन्त्र गरिरहेका छन्। उनले गणतन्त्रको रक्षा र सुदृढीकरणका लागि माओवादी केन्द्र तयार रहेको स्पष्ट पार्दै, “पार्टीले अपिल गरे लाखौँ जनता काठमाडौँको सडकमा उत्रन्छन्,” भने।
उनले प्रत्यक्ष निर्वाचित कार्यकारी प्रमुख र पूर्ण समानुपातिक निर्वाचन प्रणाली जस्ता अग्रगामी एजेन्डामा अघि बढ्नुपर्ने बताउँदै, संघीयता, समावेशिता, र समानुपातिक प्रतिनिधित्वमाथि प्रहार सह्य नहुने स्पष्ट गरे।
त्यसैगरी, उत्पीडित समुदायको अधिकार संरक्षणका लागि जातीय क्षेत्रीय मोर्चाहरूलाई पुनः सशक्त बनाउने योजना रहेको बताउँदै प्रचण्डले तामाङ, गुरुङ, थारु, र मगर मोर्चाको सम्मेलन सम्पन्न भइसकेको र बाँकी मोर्चाहरूलाई पनि क्रमशः सक्रिय बनाइने जानकारी दिए।
