काठमाडौँ, ९ चैत्र । नेपालमा स्मार्टफोनको आयात गत वर्षको तुलनामा बढ्दै गएको छ। चालु आर्थिक वर्ष २०८१/८२ को फागुन मसान्तसम्म (पहिलो ८ महिना) मा मात्र २१ अर्ब ९१ करोड ८३ लाख रुपैयाँ बराबरको १४ लाख ७ हजार ७८ थान स्मार्टफोन आयात भएको भन्सार विभागले जनाएको छ ।
गत वर्ष सोही अवधिमा १९ अर्ब ३७ करोड ७७ लाख रुपैयाँ बराबरको १२ लाख ४९ हजार ४८१ थान स्मार्टफोन आयात भएको थियो। स्मार्टफोन आयातमा भएको वृद्धिसँगै यस वर्ष राजस्व संकलन पनि उल्लेख्य रूपमा बढेको छ ।
भन्सार विभागका अनुसार गत वर्षको सोही अवधिमा ३ अर्ब ६० करोड ७५ लाख रुपैयाँ बराबर राजस्व संकलन भएकोमा चालु वर्षमा यो रकम ४ अर्ब ८ करोड ५१ लाख रुपैयाँ पुगेको छ ।
यसै अवधिमा अन्य टेलिफोन सेटहरूको आयात पनि भएको छ। चालु आर्थिक वर्षमा १ अर्ब ५२ करोड ५८ लाख रुपैयाँ बराबरको १६ लाख ९ हजार ९७ थान अन्य टेलिफोन सेट नेपाल भित्रिएको छ। यसबाट २८ करोड ३८ लाख रुपैयाँ राजस्व संकलन भएको छ ।
नेपालमा बढ्दो स्मार्टफोन आयात उपभोक्ताहरूको प्रविधिप्रतिको आकर्षण र डिजिटल पहुँच विस्तारको संकेत भए पनि यसले आयातमा निर्भर अर्थतन्त्र र व्यापार घाटीलाई असर गर्न सक्ने विज्ञहरूको भनाइ छ ।
