जनकपुर, ९ चैत्र । सिरहाको औरही गाउँपालिका-५ मा महायज्ञ आयोजना गर्ने भन्दै दीपक मलिकको घर डोजर लगाएर भत्काइएपछि उनीहरूको परिवार असुरक्षित महसुस गर्दै विस्थापित भएको छ ।
घर भत्काइएको घटना सार्वजनिक भएपछि प्रहरीले गाउँपालिका अध्यक्ष शिवजी यादवलाई पक्राउ गरेको थियो। त्यसपछि उनका छोरा रुकेश यादव ५-७ जनाको समूह लिएर मलिक परिवारलाई प्रहरीसमक्ष बयान दिन दबाब दिन पुगेको बताइएको छ ।
असुरक्षा बढेपछि दीपक मलिककी श्रीमती अनिता मलिक सिरहा नगरपालिका-१९ सन्हैठामा आफन्तको घरमा बस्न गएकी छन्, भने दीपक मलिक आफैं गाउँकै एक स्थानीयको घरमा आश्रय लिएका छन्। उनका छोराछोरीहरूलाई भने सुरक्षाको लागि प्रहरी चौकीमा राखिएको छ ।
सुरक्षा संवेदनशीलताका कारण सिरहा प्रहरीले मलिक परिवारलाई सुरक्षित स्थानमा राखेको जिल्ला प्रहरी कार्यालयका प्रमुख एसपी रमेश पण्डितले जनाएका छ न्।
घर भत्काउन नेतृत्व गरेका गाउँपालिका अध्यक्ष शिवजी यादव र पूर्ववडाअध्यक्ष दिलिप यादव पक्राउ परेपछि औरही गाउँपालिकामा सुरक्षा व्यवस्था कडा पारिएको छ। मलिक परिवारको घर सुरक्षाका लागि करिब दुई दर्जन प्रहरी परिचालन गरिएको छ ।
गत फागुन १० गते गाउँपालिका अध्यक्षकै नेतृत्वमा महायज्ञ आयोजना गर्ने स्थान खाली गराउने नाममा दीपक मलिकको घर डोजर लगाएर भत्काइएको थियो, जसले अहिले सुरक्षा र सामाजिक तनाव निम्त्याएको छ ।
