खोटाङ, ९ चैत्र ।आज बिहान खोटाङमा परेको चट्याङका कारण एक महिलाको मृत्यु भएको छ। केपिलासगढी गाउँपालिका–७ सुङदेल छिन्तेडाँडा गुल्टिङ निवासी ४५ वर्षीया दिलकुमारी राईको मृत्यु भएको जिल्ला प्रहरी कार्यालय खोटाङले जनाएको छ ।
बिहान करिब ४ः३० बजेको समयमा घरबाहिर आँगनमा राखिएका सामानहरू पानीबाट जोगाउन निस्किएका दिलकुमारीलाई अचानक चट्याङ लाग्दा घटनास्थलमै मृत्यु भएको वडाध्यक्ष तेजकुमार राईले जानकारी दिए । घटना बिहान ७ः३० बजे खबर प्राप्त हुनासाथ इलाका प्रहरी कार्यालय बाक्सिलाबाट प्रहरी टोली घटनास्थलतर्फ खटिएको प्रहरीले जनाएको छ । घटनास्थल इलाका प्रहरी कार्यालय बाक्सिलाबाट करिब ११–१२ किलोमिटर उत्तर–पूर्व दिशामा पर्छ । प्रहरीका अनुसार, कानुनी प्रक्रिया र थप अनुसन्धानका लागि जिल्ला प्रहरी कार्यालय खोटाङबाट समेत प्रहरी टोली घटनास्थलमा खटिएको छ ।
