राैतहट,१० चैत । रौतहटमा माध्यमिक शिक्षा परीक्षा (एसईई) को दौरान परीक्षार्थीहरू मोबाइल लुकाएर परीक्षा हलभित्र प्रवेश गर्ने क्रम बढेको देखिएको छ। परीक्षा सञ्चालन भएको तीन दिनको अवधिमा मात्रै १,२३३ वटा मोबाइल बरामद गरिएको छ।
जिल्ला प्रहरी कार्यालय रौतहटका अनुसार आइतबार मात्रै विभिन्न परीक्षा केन्द्रहरूबाट ४६९ वटा मोबाइल जफत गरिएको छ। परीक्षार्थीहरू ‘चिटिङ’ गर्ने उद्देश्यले मोबाइल लुकाएर परीक्षा हलभित्र प्रवेश गरेका थिए, जसलाई चेकजाँचको क्रममा बरामद गरिएको प्रहरीले जनाएको छ।
यस घटनासँगै परीक्षा हलमा खटिएका सुरक्षागार्डहरूको भूमिकामाथि पनि प्रश्न उठेको छ। जिल्ला प्रहरी कार्यालयले परीक्षा केन्द्रमा लापरवाही देखाएका दुई सुरक्षागार्डलाई नियन्त्रणमा लिएको जानकारी दिएको छ। प्रहरी प्रवक्ता डीएसपी दीपककुमार रायका अनुसार उनीहरू अमर्यादित गतिविधिमा संलग्न भएको आशंकामा पक्राउ परेका हुन्।
हालसम्म कुन परीक्षा केन्द्रबाट गार्ड पक्राउ परेका हुन् भन्ने खुलाइएको छैन। परीक्षा सुरक्षाका लागि थप निगरानी बढाइएको प्रहरीले जनाएको छ।
