मकवानपुर,२२ चैत । हेटौंडा सिमेन्ट उद्योग अब भोलीदेखि पुनः नियमित रूपमा सञ्चालनमा आउने भएको छ। आर्थिक कठिनाइ र अघोषित लोडसेडिङका कारण लामो समयदेखि बन्द रहेको यो उद्योग अब विद्युत् आपूर्ति नियमित भएपछि सञ्चालनमा ल्याउन तयार गरिएको हो।
उद्योगका निमित्त महाप्रबन्धक नविन कर्णका अनुसार,भोलीबाट उद्योगको किलमा फायर गरिने तयारी भइरहेको छ। यसअघि मंसिरदेखि नेपाल विद्युत् प्राधिकरणले दैनिक ६ घण्टा लोडसेडिङ गरेपछि उद्योग सञ्चालन गर्न कठिनाइ भइरहेको थियो। अब विद्युत् आपूर्ति नियमित भएसँगै उद्योग पुनः चल्न लागेको उनले बताए।
हेटौंडा सिमेन्ट उद्योग गत असोजमा उपकरणमा समस्या आउनुका साथै लोडसेडिङका कारण बन्द गरिएको थियो। तिहारमा मर्मत कार्य सम्पन्न भए पनि विद्युत् आपूर्ति अनियमित हुँदा उद्योग सञ्चालन गर्न सकिएको थिएन।
नवीन कर्णले भने, “विद्युत् आपूर्ति नियमित भएपछि अब उद्योग बन्द हुने छैन र नियमित चल्नेछ।” यस बीचमा उद्योगको मौज्दात रहेको करिब १ लाख ५० हजार बोरा सिमेन्ट बेचेर केही समयको लागि कर्मचारी र मजदुरको तलब भुक्तानी गरिएको थियो। उनले यो समायोजन गर्दै अब तलब पनि उपलब्ध गराइने दाबी गरे।
हेटौंडा सिमेन्ट उद्योगको सञ्चालक समितिका अध्यक्ष नरेन्द्र भण्डारीले पनि भारतीय विद्युत् आपूर्तिको नियमितता पछि उद्योग सञ्चालनको तयारी गरिएको जानकारी दिए। भारतबाट ४०६ मेगावाट विद्युत् नेपालमा आउने भएपछि औद्योगिक क्षेत्रमा लोडसेडिङ अन्त्य भएको छ।
अघिल्लो आर्थिक वर्षमा हेटौंडा सिमेन्ट उद्योगले मात्र २६ दिन सञ्चालन गरेको थियो। सरकारले केही समय अघि यस उद्योगको निजीकरणको सिफारिस गरेको थियो, तर अहिलेसम्म यो निर्णय कार्यान्वयन भएको छैन।
