बिरगंज, पर्सा – राष्ट्रिय खेलकुद परिषद् अन्तर्गत पर्सा जिल्ला खेलकुद विकास समितिको कभर्ड हलमा सन् १९९३ (वि.सं. २०५०) देखि स्थापित बिरगंज तेक्वान्दो डोजाङ अहिले विवादमा परेको छ।
तेक्वान्दो प्रशिक्षक महमद सकिलले नेपाल तेक्वान्दो संघ, काठमाडौंमा डोजाङ दर्ता गराई राष्ट्रिय तथा अन्तर्राष्ट्रिय खेलाडीहरू उत्पादन गर्दै आइरहेका छन्। हाल उनका १२० जना भन्दा बढी खेलाडी राष्ट्रिय, अन्तर्राष्ट्रिय र प्रदेशस्तरका प्रतियोगितामा सहभागी छन्।
तर, हालका कार्यालय प्रमुख तेक्वान्दो गुरु नाजिर हुसेनले महमद सकिललाई प्रशिक्षण गराउन अवरोध गरिरहेको आरोप लागेको छ। नाजिर हुसेनको प्रशिक्षण गराउने कार्यक्षेत्र नारायणी रंगशालाको कभर्ड हल भए पनि उनी सकिल गुरुको प्रशिक्षण स्थल घडीअरवा जिल्ला खेलकुद विकास समितिको कभर्ड हलमा प्रशिक्षण गराउन पुगेका थिए। यसले प्रशिक्षणमा गम्भीर समस्या सिर्जना गरेको छ।
यस विवादका कारण मगलबार १९ गते जिल्ला प्रहरी कार्यालयमा दुबै पक्षबीच छलफल भएको थियो। प्रहरी प्रशासनले राष्ट्रिय खेलकुद परिषद् बाट पत्र ल्याएर आउने सोमबार २५ गते समस्या समाधान गर्न सुझाएको थियो। तर, छलफलको केही दिनमै नाजिर हुसेनले नारायणी रंगशालाको डोजो क्लब बन्द गरी घडीअरवा पुगेर प्रशिक्षण गराउन थालेपछि स्थिति तनावग्रस्त बन्यो।
आजको घटनाका कारण खेलाडीहरू निर्धारित समयमा प्रशिक्षणबाट बञ्चित भए। पछि खेलाडीहरू सहित जिल्ला प्रहरी कार्यालय पुगेका प्रशिक्षक महमद सकिललाई सोमबार पुन: छलफल गरी समाधान गर्ने आश्वासन प्रहरी प्रशासनले दिएको छ।
राष्ट्रिय तथा अन्तर्राष्ट्रिय प्रतियोगितामा स्वर्ण पदक विजेता खेलाडी उत्पादन गर्दै आएका प्रशिक्षक सकिललाई प्रशिक्षण कार्यमा अवरोध पुर्याइनु चिन्ताको विषय भएको खेलाडी, अभिभावक तथा खेल प्रेमीहरू बताउँछन्। राष्ट्रिय खेलकुद परिषद्ले यस विषयमा छिट्टै हस्तक्षेप गरी समस्या समाधान गर्नुपर्ने माग उठेको छ।
