काठमाडौं,२५ चैत । इन्डियन प्रिमियर लिग (आईपीएल) मा गुजरात टाइटन्सले लगातार तेस्रो जित हासिल गरेको छ। आइतबार भएको खेलमा गुजरातले सनराइजर्स हैदराबादलाई ७ विकेटले हराउँदै विजयी यात्रा निरन्तरता दिएको हो।
हैदराबादलाई लगातार चौथो हारका साथ घर फर्काउने क्रममा गुजरातले १५३ रनको लक्ष्य १६.४ ओभरमा ३ विकेटको क्षतिमा पुरा गर्यो। कप्तान शुभमन गिलको अविजित ६१ रनको शानदार पारीले गुजरातलाई जित दिलायो, भने वासिङटन सुन्दरले ४९ र शेरफन रदरफोर्डले ३५ रनको योगदान दिए।
हैदराबादको लागि मोहम्मद शामीले २ विकेट लिए भने कप्तान प्याट कमिन्सले १ विकेट लिएका थिए।
यसअघि, टस हारेर पहिले ब्याटिङ गरेको हैदराबादले २० ओभरमा ८ विकेट गुमाएर १५२ रन बनाएको थियो। नितिश रेड्डीले सर्वाधिक ३१ रन बनाएका थिए, जबकि हेनरिच क्लासेनले २७ रनको योगदान दिए। कप्तान कमिन्स २२ रनमा अविजित रहे।
गुजरातको बलिङमा मोहम्मद सिराजले ४ ओभरमा १७ रन खर्चेर ४ विकेट लिए भने प्रसिद्ध कृष्णा र साइ किशोरले २-२ विकेट लिए।
यस जितसँगै गुजरात टाइटन्सले ४ खेलमा ६ अंक जोडेर अंकतालिकामा दोस्रो स्थानमा आफ्नो स्थान बनाएको छ, भने ५ खेलमा २ अंक मात्र हासिल गरेको हैदराबाद १०औं स्थानमा यथावत् रहेको छ।
