घोराही, ६ वैशाख । दाङको राप्ति गाउँपालिका–५ लठह्वामा आज साँझ यात्रुवाहक बस दुर्घटना हुँदा दुई जनाको ज्यान गएको छ भने १० भन्दा बढी यात्रु घाइते भएका छन्। बसको तीव्र गति र अनियन्त्रित अवस्थाले दुर्घटना भएको प्रहरीको प्रारम्भिक अनुमान छ।
कृष्णनगरबाट लमहीतर्फ जाँदै गरेको बा ३ ख ७९९६ नम्बरको बस अनियन्त्रित भई दुर्घटना हुँदा राजपुर गाउँपालिका–५ निवासी ५६ वर्षीय निलसरोज यादवको घटनास्थलमै मृत्यु भएको छ। अर्की एक महिलाको उपचारका क्रममा ज्यान गएको जिल्ला प्रहरी कार्यालय दाङका प्रमुख एसपी अर्जुनप्रसाद तिमिल्सिनाले जानकारी दिए।
दुर्घटनामा घाइते भएकामध्ये केहीको अवस्था गम्भीर रहेको जनाइएको छ। उनीहरूको सिसहनियाँ र लमहीका विभिन्न अस्पतालमा उपचार भइरहेको छ।
प्रहरीका अनुसार बस तीव्र गतिमा रहेको र मोड काट्ने क्रममा चालकले नियन्त्रण गुमाएपछि दुर्घटना भएको हो। घटनाको थप अनुसन्धान जारी छ।
