काठमाडौं,०९ वैशाख । देशभर हाल स्थानीय वायुराशि र पश्चिमी वायु प्रणालीको आंशिक प्रभाव सक्रिय रहेको मौसम पूर्वानुमान महाशाखाले जानकारी दिएको छ। यस प्रणालीको असरले कोशी र गण्डकी प्रदेशका पहाडी भेगहरूमा आंशिक बदली देखिएको छ भने बाँकी धेरैजसो क्षेत्रमा मौसम खुलेको छ।
आज दिउँसो कोशी, बागमती, गण्डकी र कर्णाली प्रदेशका पहाडी तथा हिमाली भूभागमा मौसम आंशिकदेखि सामान्य बदली रहनेछ। ती क्षेत्रमा केही स्थानहरूमा चट्याङ्गसहित हल्का देखि मध्यम वर्षाको सम्भावना छ। साथै, उच्च पहाडी र हिमाली क्षेत्रहरूमा हल्का हिमपात पनि हुन सक्ने अनुमान गरिएको छ।
रातिको समयमा पनि कोशी र गण्डकी प्रदेशका पहाडी क्षेत्रमा बादल लाग्ने र कतिपय स्थानहरूमा वर्षा तथा हिमपात हुने सम्भावना रहेको मौसमविद्हरूले बताएका छन्।
मौसममा आएको यस परिवर्तनका कारण कृषिक्षेत्र, जनजीवन, यातायात, स्वास्थ्य सेवा र हवाई उडानमा असर पर्न सक्ने भएकाले महाशाखाले आम नागरिकलाई आवश्यक सतर्कता अपनाउन अनुरोध गरेको छ।
