काठमाडौं,०९ वैशाख । नेपाल कम्युनिस्ट पार्टी (माओवादी केन्द्र) का अध्यक्ष तथा प्रधानमन्त्री पुष्पकमल दाहाल ‘प्रचण्ड’ ले अहिले मानव जातिले भोगिरहेको बहुआयामिक संकटको समाधान क्रान्तिकारी कम्युनिस्ट पार्टीले मात्र गर्न सक्ने दाबी गरेका छन्।
सोमबार, महान कम्युनिस्ट नेता भ्लादिमिर इलिच लेनिनको जन्मजयन्ती तथा नेपाल कम्युनिस्ट पार्टीको स्थापना दिवसको अवसरमा शुभकामना सन्देश जारी गर्दै प्रचण्डले वर्तमान समयलाई लेनिनका विचारहरू अझ सान्दर्भिक भएको उल्लेख गरेका हुन्।
“पुँजीवादले बढाउँदै लगेको असमानता, युद्ध, बेरोजगारी, सांस्कृतिक पतन र वातावरणीय संकटका बीचमा लेनिनले देखाएको बाटो आजको विश्वमा अझ जरुरी भएको छ,” सन्देशमा प्रचण्डले भनेका छन्, “र यो संकटको समाधान क्रान्तिकारी कम्युनिस्ट पार्टीबाटै सम्भव छ भन्ने कुरा पुनः पुष्टि भइरहेको छ।”
प्रचण्डले नेपालमा २००६ साल (१९४९ अप्रिल २२) मा स्थापना भएको कम्युनिस्ट पार्टीले सामन्तवाद र साम्राज्यवादविरुद्ध जनवादी क्रान्ति गर्दै समाजवाद र साम्यवादतर्फको यात्राको बाटो पहिल्याएको पनि स्मरण गराएका छन्।
उनले भनेका छन्, “कम्युनिस्ट आन्दोलनसँगै समाजका पीडित, वञ्चित, उपेक्षित वर्ग र समुदायको आवाज मुखर बन्यो र लामो संघर्षको परिणामस्वरूप हामी समावेशी, धर्मनिरपेक्ष संघीय लोकतान्त्रिक गणतन्त्रमा आइपुगेका छौं।”
तर उनले हालका केही “प्रतिगमनकारी र पुनरुत्थानवादी शक्तिहरू” नेपाली जनताको संघर्षबाट प्राप्त उपलब्धिहरू खोस्न उद्धत रहेको आरोप पनि लगाए।
“संघर्षको जगमा प्राप्त उपलब्धिहरू नै नेपाली जनताले युगौँदेखि देखेका सपना हुन्, र तिनको रक्षा तथा विकास गर्दै मात्र समाजवादतर्फको यात्रालाई निरन्तरता दिन सकिन्छ,” सन्देशमा प्रचण्डले उल्लेख गरेका छन्।
यो सन्देशले नेपालको वर्तमान राजनीतिक परिवेशमा विचारधारागत बहसलाई पुनः ताजा बनाएको छ, जहाँ विगतका संघर्ष, वर्तमान संकट र भावी दिशा तीनैलाई जोडेर प्रचण्डले कम्युनिस्ट आन्दोलनको भूमिका पुनः उजागर गर्न खोजेका देखिन्छन्।
