काठमाडौं,१० वैशाख । काठमाडौं महानगरपालिकाले चालु आर्थिक वर्षको बैशाख ७ गतेसम्ममा कुल ७ अर्ब २१ करोड ६२ लाख ८४ हजार रुपैयाँ राजस्व संकलन गरेको छ। गत वर्षको तुलनामा यसपटक घरबहाल कर र सम्पत्ति कर शीर्षकमा उल्लेखनीय वृद्धि देखिएको छ।
महानगरका राजस्व विभाग प्रमुख दीपक अधिकारीका अनुसार, चालु आर्थिक वर्षमा घरबहाल करबाट २ अर्ब ११ करोड ६५ लाख रुपैयाँ संकलन गरिएको छ, जुन गत वर्षको सोही अवधिको तुलनामा २५ करोडभन्दा बढी हो।
त्यस्तै, सम्पत्ति करतर्फ पनि १५ करोडभन्दा बढी वृद्धि भएको छ। गत वर्ष ७९ करोड संकलन भएकोमा यस वर्ष ९४ करोड ७५ लाख रुपैयाँ संकलन गरिएको छ।
अधिकारीले राजस्व वृद्धिको कारणबारे बताउँदै भने, “व्यवसाय कर टोलीलाई नियमित रूपमा परिचालन गरिरहेका छौँ। साथै, राजस्व कार्यालयसँग समन्वय गर्दै करदाताको विस्तृत विवरण महानगरको डेटाबेसमा समेटेका छौँ।”
यससँगै अन्य शीर्षकमा पनि केही वृद्धि देखिएको छ — पर्यटन शुल्कबाट १ करोड ६७ लाख, शिफारिस दस्तुरबाट ७१ लाख, प्रशासनिक जरिवाना र दस्तुरबाट ३९ लाख रुपैयाँभन्दा बढी संकलन भएको छ।
तर, सबै क्षेत्रमा वृद्धि देखिएको छैन। नक्सा पास दस्तुर र अन्य प्रशासनिक सेवा शुल्कतर्फ राजस्व घटेको देखिन्छ। नक्सा पास दस्तुर गत वर्षको तुलनामा २० करोड रुपैयाँ कम संकलन भएको छ, जसको कारण सहरमा भवन निर्माणका लागि स्थान कम हुँदै जानु हो भनेको अधिकारीको तर्क छ।
त्यस्तै, हनुमानढोका दरबार संरक्षण कार्यक्रमअन्तर्गत पनि आयमा वृद्धि भएको छ। गत वर्ष १४ करोड संकलन गर्ने कार्यक्रमले यो वर्ष १५ करोड ७८ लाख रुपैयाँ संकलन गरेको छ।
