बीरगन्ज,२७ वैशाख । बीरगन्ज महानगरपालिकाको वडा नम्बर २१ मा अवरुद्ध रहेको सडक विस्तार कार्यलाई अघि बढाउन वर्षौंदेखि भइरहेको अतिक्रमण अन्ततः हटाइएको छ। परवानीपुर चोकदेखि पटेलनगरसम्मको सडक खण्डमा रहेका टहरा र अवैध संरचनाहरू शुक्रबार हटाइएको हो।
आर्थिक वर्ष २०७५/७६ मै पप्पु कन्स्ट्रक्सन र स्वच्छन्द निर्माण सेवाले संयुक्त रुपमा सडक स्तरोन्नति तथा विस्तारको ठेक्का लिएको भए पनि अतिक्रमण नहटेकाले काम रोकिएको थियो। सडकको दायाँ–बायाँ सरकारी जमिन अतिक्रमण गरी बनाइएका संरचनाले वर्षौंदेखि विकास रोकिएको थियो।
महानगर प्रमुख राजेशमान सिंहको विशेष निर्देशनमा अतिक्रमण हटाउने कार्य अघि बढाइएको हो। सिंहको निर्देशनपछि भौतिक अतिक्रमण नियन्त्रण समितिले शुक्रबार रामनारायण साह, प्रभु महतो, राजाराम यादव, राजेश महतोलगायतका व्यक्तिहरूले सरकारी जमिनमा बनाएका टहरा र संरचनाहरू हटाएको छ।
स्थानीय बासिन्दाहरूलाई आवत–जावतमा परेको समस्या र सडक साँघुरो हुँदा बढेको ट्राफिक जामलाई ध्यानमा राखी मेयर सिंहले समस्या समाधानका लागि तत्काल कारबाही अघि बढाएका थिए।
अतिक्रमण हटाउने कार्यमा समितिका सल्लाहकार हरि पोखरेलको नेतृत्वमा अमिनसहितको प्राविधिक टोली खटिएको थियो। साथै, वडाध्यक्ष राधाकृष्ण रौनियार, मेयरका जनसम्पर्क सल्लाहकार नवराज फुयाँल, नगर प्रहरी प्रमुख हरिप्रसाद भुसालसहितको टोलीको सक्रिय सहभागिता रहेको थियो।
