काठमाडौं,०६ जेठ। परराष्ट्रमन्त्री डा. आरजु राणा देउवा नियमित स्वास्थ्य परीक्षणका लागि थाइल्यान्ड हुँदै जापान प्रस्थान गरेकी छन्।
मन्त्री राणा सोमबार राति काठमाडौंबाट जापानतर्फ प्रस्थान गरेकी हुन्। उनको सचिवालयले स्वास्थ्य उपचारको उद्देश्यले जापान गएकी जानकारी दिएको छ।
जापान बसाइका क्रममा मन्त्री राणाले टोकियोमा आयोजना हुने ज्येष्ठ नागरिकसम्बन्धी अन्तर्राष्ट्रिय सम्मेलनमा सहभागी हुने कार्यक्रम पनि रहेको छ। सम्मेलनमा उनले सम्बोधन गर्ने तयारी समेत गरिएको स्रोतले जनाएको छ।
यद्यपि सचिवालयले मुख्यतः स्वास्थ्य उपचारका लागि जापान गएकी बताएको भए पनि, उनको बसाइका क्रममा द्विपक्षीय भेटवार्ताहरूको कार्यक्रम पनि तय भएको स्रोतको दाबी छ। विदेश यात्राका क्रममा मन्त्री राणाले जापानी समकक्षीसँग द्विपक्षीय सम्बन्ध सुदृढीकरणका विषयमा छलफल गर्ने सम्भावना रहेको बुझिएको छ।
