काठमाडाैं,०६ जेठ । नेकपा एमालेका महासचिव शंकर पोखरेलले आगामी जेठ १५ देखि सुरु हुने राजावादी आन्दोलनलाई नेपाली जनताको विरुद्धको काम र गणतन्त्रको उपलब्धिमाथिको साजिश भएको आरोप लगाएका छन्। मंगलबार दाङमा आयोजित ४१ औं नेत्रलाल पौडेल ‘अभागी’ स्मृति दिवसमा बोल्दै पोखरेलले राजसंस्थाका समर्थकहरूले भ्रम फैलाएर निरंकुशताको पक्षपोषण गर्दै जनअधिकारमाथि प्रहार गरिरहेको बताए।
पोखरेलले भने, “राजसंस्था कहिल्यै जनताको हितमा थिएन। उनीहरूले निरंकुश शासनमार्फत जनता शोषणमा राखे।” उनका अनुसार राजावादी आन्दोलन कुनै पार्टीविरुद्ध नभई नेपाली जनताको सार्वभौम अधिकारमाथिको चुनौती हो।
साथै, उनले सबैमा सचेत भएर यसलाई असफल बनाउने कार्यमा एमाले अगाडि रहने बताए।
उनी युवाहरूको विदेश पलायनबारे पनि चिन्तित देखिए। पोखरेलले भने, “देश छोडेर विदेश गएर विकास हुँदैन, आफ्नै देशमै पसिना बगाउनुपर्ने आवश्यकता छ।” उनले विदेश जाने युवाको पीडा बुझ्ने भए पनि यो प्रवृत्ति रोक्न एमालेले सक्रिय नेतृत्व लिने पनि बताए।
