काठमाडौं,०८ जेठ । देशभर मौसममा चारवटा वायू प्रणालीको संयुक्त प्रभाव देखिएको मौसम पूर्वानुमान महाशाखाले जनाएको छ। पश्चिमी वायु, स्थानीय वायु, बङ्गालको खाडी र अरब सागरबाट आएको जलवाष्पयुक्त हावाको प्रभावले देशका विभिन्न भागमा मौसम बदलीसहित चट्याङसहित वर्षाको सम्भावना रहेको छ।
हाल कोशी, मधेस, बागमती र कर्णाली प्रदेशका केही स्थानमा हल्का वर्षा भइरहेको छ। आज दिउँसो देशभर आंशिकदेखि सामान्य बदली रहनेछ। विशेषगरी कोशी, बागमती, लुम्बिनी, गण्डकी र सुदूरपश्चिम प्रदेशका पहाडी भूभागमा तथा अन्य केही स्थानमा चट्याङसहित हल्कादेखि मध्यम वर्षा हुने सम्भावना छ।
देशका उच्च पहाडी र हिमाली क्षेत्रका एक-दुई स्थानमा हल्का वर्षासँगै हिमपात हुन सक्ने पूर्वानुमान गरिएको छ।
राति पनि कोशी, मधेस, बागमती र गण्डकी प्रदेशका पहाडी भूभागमा चट्याङसहित हल्कादेखि मध्यम वर्षा तथा केही स्थानमा हिमपातको सम्भावना कायमै रहने महाशाखाले जनाएको छ।
वर्षा र चट्याङको असरले जनजीवन, खेतीपाती, स्वास्थ्य, यातायात र हवाई उडान प्रभावित हुन सक्ने भएकाले आवश्यक सतर्कता अपनाउन महाशाखाले सबैलाई अनुरोध गरेको छ।
