चितवन,०८ जेठ । चितवनको नारायणघाट–मुग्लिङ सडक खण्डमा आज बिहान दुई ट्रक एकआपसमा ठोक्किँदा सात जना घाइते भएका छन्।
भरतपुर–२९ स्थित सडकखण्डमा नारायणघाटबाट मुग्लिङतर्फ जाँदै गरेको बागमती प्रदेश ०१–००६ ख ६२८७ नम्बरको ट्रक र विपरीत दिशाबाट आइरहेको ना ६ ख ९८९७ नम्बरको ट्रक एकआपसमा ठोक्किएका हुन्।
ट्रक ठोक्किँदा दुबै सवारीका अगाडिका भागमा गम्भीर क्षति पुगेको छ। दुर्घटनामा परेका मध्ये ना ६ ख ९८९७ नम्बरको ट्रकमा सवार रौतहट बौदीमाई–७ निवासी २५ वर्षीय जयकान्त राय यादव, हरिशंकर यादव, आकाश यादव, रविकुमार यादव र अनिल कुमार यादव घाइते भएका छन्। उनीहरूको भरतपुर अस्पतालमा उपचार भइरहेको छ।
त्यस्तै, बागमती प्रदेश ०१–००६ ख ६२८७ नम्बरको ट्रक चालक भरतपुर–१२ मुनालचोकका ३७ वर्षीय सन्तोष सुबेदी र अर्को ट्रक चालक रौतहट गरूडा–५ का ३४ वर्षीय धनराज कुमार यादवको चितवन मेडिकल कलेजमा उपचार भइरहेको जिल्ला प्रहरी कार्यालयले जनाएको छ।
दुर्घटनापछि केही समय अबरुद्ध बनेको सडक हाल पुनः सञ्चालनमा ल्याइएको छ। प्रहरीले दुर्घटनाको कारणबारे थप अनुसन्धान भइरहेको जानकारी दिएको छ।
