काठमाडौं,०८ जेठ । दिगो पर्यटन सहकारीबाट लिएको ऋण समयमै नतिरेपछि नेकपा (एमाले) का नेता कृष्ण कुमार अर्याल पक्राउ परेका छन्। ललितपुरको सानेपामा बसोबास गर्दै आएका अर्याललाई प्रहरीले सोह्रखुट्टेमा अवस्थित दिगो पर्यटन सहकारीको उजुरीका आधारमा पक्राउ गरेको हो।
उपत्यका अपराध अनुसन्धान कार्यालयका प्रमुख एसपी काजी कुमार आचार्यका अनुसार, अर्याललाई बिहीबार पक्राउ गरिएको हो। “सहकारीबाट लिएको ऋण नतिरी अटेर गरेपछि अदालतको फैसला अनुसार पक्राउ गरिएको हो,” उनले बताए।
काठमाडौँ जिल्ला अदालतले २०८० असार २७ गते अर्याललाई १ वर्ष कैद सजायसहित ११ लाख ५० हजार रुपैयाँ बिगो तथा जरिवाना तिर्न आदेश दिएको थियो। तर, अदालतको आदेशलाई वेवास्ता गर्दै अर्याल लामो समयदेखि फरार जस्तै थिए।
अर्याल नेकपा एमालेको पेसागत विशेष प्रदेश कमिटी सदस्य तथा पूर्व नेपाल पर्यटन बोर्डका सदस्य समेत रहेका थिए।
