जनकपुर,२३ जेठ । मधेश प्रदेश सरकारले आज प्रदेश सभामा आगामी आर्थिक वर्ष २०८२/८३ का लागि नीति तथा कार्यक्रम प्रस्तुत गर्ने भएको छ। प्रदेशप्रमुख सुमित्रा भण्डारीले प्रदेशसभामा सरकारको नीति तथा कार्यक्रम औपचारिक रूपमा सार्वजनिक गर्नेछिन्।


मधेश नीति आयोगका उपाध्यक्ष सोहनप्रसाद साहका अनुसार नीति तथा कार्यक्रममा कृषि क्षेत्रलाई शीर्ष प्राथमिकतामा राखिएको छ। साथै शिक्षा, स्वास्थ्य र रोजगारी सिर्जनालाई पनि विशेष महत्व दिइएको उनले जानकारी दिए।
उपाध्यक्ष साहले भने, “आगामी वर्षको नीति तथा कार्यक्रमले जनताको जीवनस्तर सुधार गर्ने दिगो मार्ग तय गर्नेछ। कृषि उत्पादनमा आत्मनिर्भरता, शिक्षामा गुणस्तर, स्वास्थ्य पहुँचको विस्तार र रोजगारी सिर्जनाका स्पष्ट रणनीतिहरू यसपटक समेटिएका छन्।”

यसअघि मधेश सरकारले दिगो विकासका लक्ष्यअनुसार संरचनात्मक सुधार र स्थानीय स्तरमा उत्पादनमुखी कार्यक्रम सञ्चालन गर्ने प्रतिबद्धता जनाएको थियो।