धरान,२६ जेठ । रासायनिक मल भ्रष्टाचार मुद्दाका दोषी पक्राउ परेका छन् । आइतबार भ्रष्टाचारका दोषी रामधुनी-७ का खगेन्द्र बस्नेतलाई इलाका प्रहरी कार्यालय पकलीको टोलीले पक्राउ गरेको हो । बस्नेतविरुद्द अख्तियार दुरुपयोग अनुसन्धान आयोगले विशेष अदालत काठमाडौंमा भ्रष्टाचार मुद्दा दर्ता गरेको थियो ।
बस्नेतविरुद्दको भ्रष्टाचार मुद्दामा विशेष अदालतको २०७९ भदौ २८ गते साल्ट ट्रेडिङ कर्पोरेशन लिमिटेड बिराटनगरको गोदाममा मौज्दात रासायनिक मल हिनामिना गरी भ्रष्टाचार गरेको मुद्दामा २ वर्ष ६ महिना कैद र ९ लाख २८ हजार ६७५ रुपैयाँ जरिवानाको फैसला गरेको थियो ।
विशेषको फैसलापछि फरार रहेका बस्नेतलाई प्रहरी निरीक्षक लेखनाथ दाहालको नेतृत्वको टोलीले पक्राउ गरेको थियो । बस्नेतलाई पक्राउ गरेपछि अदालतको फैसला कार्यान्वयन लागि अदालतमा बुझाइएको जिल्ला प्रहरी कार्यालय सुनसरीका डीएसपी योगराज खतिवडाले बताएका छन् ।
