काठमाडाैं,२८ जेठ । माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले मुलुक फेरि पुरानो व्यवस्था अर्थात् केन्द्रीकृत शासन प्रणालीमा नफर्कने स्पष्ट पारेका छन्।
बुधबार अन्नपूर्ण गाउँपालिका–३ मा अवस्थित ज्ञानप्रकाश नमूना माध्यमिक विद्यालयले आयोजना गरेको कार्यक्रममा बोल्दै अध्यक्ष दाहालले संघीय लोकतान्त्रिक गणतन्त्र नेपाल जनताको बलिदान र लामो राजनीतिक संघर्षबाट स्थापित भएको उल्लेख गर्दै, “अब यो व्यवस्था उल्टिने छैन, सुधार गर्दै अघि बढ्नुपर्छ,” भने।
उनले हालको प्रणालीमा देखिएका कमजोरीहरूलाई सच्याउँदै जनतामा आशा जगाउने खालका काम गर्न राजनीतिक नेतृत्व प्रतिबद्ध हुनुपर्ने आवश्यकता औँल्याए। “राजनीतिमा निराशा फैलिन नदिन नेताहरू जनतामाझ पुगेर उनीहरूको समस्या बुझ्नुपर्छ, म स्वयं घरदैलोमा पुगेर जनताको आवाज सुन्दै आएको छु,” उनले भने।
कार्यक्रममा उनले कालीगण्डकी करिडोरको निर्माणलाई प्राथमिकतामा राखेर आफूले सक्दो पहल गर्ने बताए। “यो आयोजना राष्ट्रिय महत्वको हो, चाँडोभन्दा चाँडो सम्पन्न गर्न म जिम्मेवार रूपमा लाग्नेछु,” उनले थपे।
