काठमाडौं,०४ असार । नेपालमा मनसुन थप सक्रिय बनेसँगै देशका अधिकांश भागमा बदलीको अवस्था देखिएको छ। हाल कोशी, मधेस, बागमती, गण्डकी र लुम्बिनी प्रदेशमा मनसुनी प्रणालीको प्रभाव व्यापक रहेको छ भने पश्चिम क्षेत्रतिर पश्चिमी वायु र स्थानीय प्रणालीको आंशिक असर देखिएको मौसम पूर्वानुमान महाशाखाले जनाएको छ।
यस प्रणालीको प्रभावले देशभर आंशिकदेखि पूर्ण बदलीको अवस्था छ। बागमती प्रदेशका केही स्थान तथा कोशी, लुम्बिनी र कर्णाली प्रदेशका एक–दुई स्थानमा अहिले नै चट्याङसहित हल्कादेखि मध्यम वर्षा भइरहेको छ।
महाशाखाका अनुसार आज दिउँसो र राति देशभर मौसम पूर्ण बदली रहनेछ। विशेषगरी कोशी, बागमती, गण्डकी र लुम्बिनी प्रदेशका धेरै स्थानहरूमा चट्याङसहित हल्कादेखि मध्यम वर्षाको सम्भावना छ। ती प्रदेशका एक–दुई स्थानमा भारीदेखि अति भारी वर्षा हुन सक्ने चेतावनी दिइएको छ। उच्च पहाडी र हिमाली क्षेत्रमा भने हल्का वर्षासहित हिमपातको सम्भावना पनि रहेको छ।
आज राति पनि यस्तै अवस्था रहनेछ। कोशी, मधेस, बागमती, गण्डकी र लुम्बिनी प्रदेशमा धेरै स्थानमा वर्षा सम्भावित छ भने थोरै भूभागमा अत्यधिक वर्षा हुने अनुमान गरिएको छ।
महाशाखाले अत्यधिक वर्षाको असरले दैनिक जनजीवन, कृषि, यातायात (सडक र हवाई) र स्वास्थ्यमा असर पार्न सक्ने भन्दै ती क्षेत्रका बासिन्दालाई सतर्क रहन आग्रह गरेको छ। विशेषगरी बाढीपहिरोको जोखिम रहेको स्थानमा आवश्यक सावधानी अपनाउन सुझाव दिइएको छ।
