बारा,०४ असार । बाराको कलैया उपमहानगरपालिका–१४ बघवनमा पुरानो विवादका कारण ५० वर्षीय नन्दु राउत कुर्मीको कुटपिट गरी हत्या गरिएको घटनामा एक महिलासहित चार जना पक्राउ परेका छन्।
जिल्ला प्रहरी कार्यालय बाराका अनुसार, घटनामा संलग्न रहेको आरोपमा पक्राउ पर्नेहरूमा २८ वर्षीय दिगम्बर साह कलवार, ३८ वर्षीया रञ्जु जयसवाल (उमेश जयसवालकी पत्नी), रञ्जुका दुई छोरा २० वर्षीय सुमित जयसवाल र १८ वर्षीय सुजित जयसवाल रहेका छन्।
प्रहरीका अनुसार, जेठ २९ गते साँझ करिब ६:१५ बजे नन्दु राउत कुर्मीलाई पुरानो रिसइबीका कारण उमेश जयसवालसहित ६ जनाले कुटपिट गरेका थिए। गम्भीर घाइते कुर्मीलाई तत्काल उपचारका लागि कलैयास्थित प्रादेशिक अस्पताल पुर्याइएको थियो, तर उपचारका क्रममा साँझ ७:२० बजे उनको मृत्यु भयो।
प्रहरीले घटना हुनासाथ दिगम्बर साहलाई घटनास्थलबाटै नियन्त्रणमा लिएको थियो। त्यसपछि फरार अन्य आरोपीको खोजीका क्रममा कलैया–५ मा लुकेर बसेकी रञ्जु जयसवाल र पर्साको वीरगञ्ज महानगरपालिका–१ शान्तिटोलमा लुकेका उनका दुई छोरा सुमित र सुजितलाई बुधबार पक्राउ गरिएको हो।
घटनामा संलग्न मुख्य आरोपी उमेश जयसवालसहित दुई जना भने अझै फरार रहेको प्रहरीले जनाएको छ। उनीहरूको खोजी तीव्र पारिएको र घटनाबारे थप अनुसन्धान भइरहेको बाराका प्रहरी नायव उपरीक्षक जानकारी दिइएको छ।
