चितवन,०६ असार । पूर्वपश्चिम राजमार्गअन्तर्गत नारायणघाट–बुटवल सडकखण्डमा बाढीले एक यात्रुवाहक बस बगाएको छ। तर, समयमै उद्धार गरिएकाले ३८ जना यात्रु सुरक्षित रहेका छन्।
काठमाडौंबाट नेपालगञ्जतर्फ जाँदै गरेको भे१ख ४०८५ नम्बरको बस विनयी त्रिवेणी गाउँपालिका–१ स्थित विनयी खोलामा आएको बाढीले बगाएको हो। घटना गएराति डाइभर्सन पार गर्ने क्रममा भएको हो।
इलाका प्रहरी कार्यालय दुम्कीबासका प्रमुख प्रहरी निरीक्षक राजन तिमिल्सेनाका अनुसार बाढी एक्कासी आएपछि बस बगाएको थियो।“नयाँ डाइभर्सन पार गर्दै गर्दा बाढीले बस बगायो,” उनले बताए, “तत्काल एक्साभेटरको सहायतामा सबै यात्रुको सकुशल उद्धार गर्न सफल भयौं।”
बसमा ३ जना शिशुसहित ३८ यात्रु सवार थिए। कुनै पनि यात्रु घाइते नभएको प्रहरीले जानकारी दिएको छ।
विनयी खोलामा पानीको बहाव अझै बढिरहेकोले बस खोलाबाट निकाल्न नसकिएको प्रहरीले जनाएको छ।
यात्रुहरूको व्यक्तिगत सामानबारे यकिन विवरण भने अझै आउन बाँकी छ।
रातभर परेको लगातार पानीका कारण नारायणघाट–बुटवल सडक पूर्णरूपमा अवरुद्ध भएको छ। दाउन्ने क्षेत्रमा सडक हिलोमय बनेपछि कुनै पनि सवारीसाधन चल्न सकेका छैनन्।
