काठमाडौँ,०६ असार । संसदको आजको बैठकमा प्रमुख प्रतिपक्षी दलहरूको अवरोधका कारण प्रधानमन्त्रीसँगको प्रत्यक्ष प्रश्नोत्तर कार्यक्रम स्थगित गरिएको छ।
आजको कार्यसूचीअनुसार प्रधानमन्त्री केपी शर्मा ओलीसँग सांसदहरूले प्रत्यक्ष प्रश्न राख्ने कार्यक्रम तय गरिएको थियो। तर, राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)को लगातारको विरोध र नाराबाजीका कारण कार्यक्रम हटाइएको हो।
सभामुख देवराज घिमिरेले बैठकमा जानकारी दिँदै, “विशेष कारणवश आजको प्रधानमन्त्रीसँगको प्रश्नोत्तर कार्यक्रम स्थगित गरिएको छ,” भनेका छन्।
रास्वपाले गृहमन्त्री रमेश लेखकको राजीनामा र भिजिट भिसा प्रकरणमा छानबिन समिति गठनको माग गर्दै चैत १३ गतेदेखि सदनमा अवरोध गर्दै आएको छ। सोही आन्दोलनको निरन्तरताका रूपमा आज पनि सांसदहरू कालो पोशाकमा नाराबाजीका साथ वेल घेरेका थिए।
सभामुख घिमिरेले रास्वपालाई पटक–पटक आग्रह गर्दै प्रधानमन्त्री बोलिरहँदा वेलमा होहल्ला नगर्न र विरोधको शैली परिमार्जन गर्न अनुरोध गरेका थिए। शुक्रबार बिहान रास्वपा प्रमुख सचेतक सन्तोष परियारलाई कार्यकक्षमा बोलाएर पनि सभामुखले आग्रह गरेका थिए। तर रास्वपाले सो आग्रह अस्वीकार गर्दै विरोध जारी राख्ने बताएको हो।
सत्तापक्षका मुख्य सचेतक महेश बर्तौला र कांग्रेसका प्रमुख सचेतक श्यामकुमार घिमिरेले समेत विपक्षी दललाई सदनको मर्यादा कायम राख्दै संवादको वातावरण बनाउन आग्रह गरेका थिए।
तर, विपक्षी दलको कठोर अडानले गर्दा संसदमा संवादभन्दा पनि द्वन्द्वको अवस्था सिर्जना भइरहेको छ।
