काठमाडाैं,०६ असार । बर्खा मौसममा सम्भावित बाढी र पहिरोको जोखिमलाई मध्यनजर गर्दै बीपी राजमार्गमा रातिको समयमा सवारी साधन चलाउन १५ दिनका लागि रोक लगाइएको छ।
शुक्रबार काभ्रे, सिन्धुली र रामेछाप जिल्लाका सुरक्षा निकायबीच सम्पन्न अन्तरजिल्ला समन्वय समितिको बैठकले असार ६ गतेदेखि लागू हुने गरी साँझ ६:३० बजेदेखि बिहान ५ बजेसम्म गाडी चलाउन निषेध गर्ने निर्णय गरेको हो।
विशेष गरी काभ्रेको काभ्रे भञ्ज्याङदेखि सिन्धुलीको खुर्कोटसम्मको खण्डलाई अति जोखिमयुक्त क्षेत्रका रूपमा चिनिँदै आएको छ। थोरै पानी परे पनि पहिरो खस्ने र सडक अबरुद्ध हुने घटनाहरू पटक–पटक दोहोरिँदै आएकाले यो निर्णय गरिएको हो।
सुरक्षा निकायका प्रमुखहरूका अनुसार, यात्रुहरूको सुरक्षालाई पहिलो प्राथमिकतामा राख्दै अन्तरजिल्ला सहकार्यमा यस्तो निर्णय लिइएको हो। “रातिको समयमा हुने दुर्घटना, पहिरो र आवागमन अवरुद्धजस्ता घटनाबाट यात्रुहरूलाई जोगाउन यो रोक आवश्यक छ,” उनीहरूले बताएका छन्।
प्रशासनले यात्रुहरूलाई रातिको समयमा बीपी राजमार्ग प्रयोग नगर्न अनुरोध गरेको छ।
