जनकपुर,१७ असार । मधेशमा मंगलबार भएका दुई फरक सवारी दुर्घटनामा दुई जनाको मृत्यु भएको छ।
धनुषाको जनकपुरधाम उपमहानगरपालिका–१४ मा मधेश प्रदेश ०२–००१ क २२४० नम्बरको टिपरले ज ८ प ७७४३ नम्बरको मोटरसाइकललाई दिउँसो ठक्कर दिँदा ८० वर्षीय चलितर मण्डलको मृत्यु भएको हो। उनी धनुषा क्षिरेश्वरनाथ नगरपालिका–१० का बासिन्दा हुन्।
गम्भीर घाइते मण्डलको उपचारका क्रममा प्रादेशिक अस्पताल जनकपुरमा मृत्यु भएको जनाइएको छ। दुर्घटनामा घाइते मोटरसाइकल चालकलाई थप उपचारका लागि काब्या अस्पताल जनकपुर पठाइएको छ। टिपर चालकलाई प्रहरीले नियन्त्रणमा लिएको छ।
उता, सप्तरीको कञ्चनरुप नगरपालिका–२ महादेवपट्टीमा मंगलबार बिहान बीरगन्जबाट विराटनगरतर्फ जाँदै गरेको को १ ख ५४३८ नम्बरको बसले ठक्कर दिँदा ८ वर्षीय आयन शेखको घटनास्थलमै मृत्यु भएको छ। उनी सोही ठाउँका रोजित शेखका छोरा हुन्।
बस चालकलाई पनि प्रहरीले नियन्त्रणमा लिई आवश्यक अनुसन्धान अघि बढाएको जनाएको छ।
