जनकपुर,२१ असार । नेपाली कांग्रेसका केन्द्रीय सदस्य तथा प्रतिनिधिसभा सदस्य विमलेन्द्र निधिले राजनीतिक हस्तक्षेपका कारण राजर्षिजनक विश्वविद्यालयको केन्द्रीय प्रशासनिक भवन निर्माण रोकिएको आरोप लगाएका छन्।
शनिबार जनकपुरधाममा आयोजित पत्रकार सम्मेलनमा नेता निधिले जनकपुरको फुलगामा भवन निर्माणका लागि आवश्यक जग्गा तथा बजेट सुनिश्चित भइसके पनि केही नेताहरूको दबाबका कारण शिक्षा मन्त्रालयमार्फत निर्माण प्रक्रिया अवरुद्ध भएको दाबी गरे।
“पहिला जनकपुरमा भवनका लागि जग्गा खोज्यौं, पाइएन,” निधिले भने, “अब फुलगामा गुठी संस्थानसँग सहमति भएको १३ बिघा जमीन छ, बजेट पनि छ – तर राजनीतिक चलखेलले काम अघि बढ्न सकेको छैन।”
उनका अनुसार संघीय सरकारको पूर्ण स्वामित्वमा रहेको विश्वविद्यालयको भवन निर्माणका लागि ८ करोड रुपैयाँ विनियोजन भइसकेको छ। तर, धनुषा क्षेत्र नं. ३ र ४ का केही जनप्रतिनिधिहरुले नगराइन नगरपालिका अन्तर्गत पर्ने फुलगामा भवन बन्न नदिएको आरोप निधिले लगाए।
राजर्षिजनक विश्वविद्यालयको ऐनअनुसार जनकपुरस्थित रामसागर रामस्वरूप बहुमुखी क्याम्पस, सिरहा र सप्तरीका क्याम्पसहरू आधार क्याम्पस हुने व्यवस्था भए पनि त्यसको कार्यान्वयन राजनीतिक कारणले अड्किएको निधिको भनाइ छ।
यसैबीच विश्वविद्यालयका उपकुलपति प्रो. डा. अमर प्रसाद यादवले भने भवन निर्माणमा ढिलाइ हुनुको कारण विश्वविद्यालय अनुदान आयोग (UGC) बाट आवश्यक स्वीकृति समयमै नआउनु रहेको बताए।
“विश्वविद्यालय ऐनअनुसार केन्द्रीय कार्यालय धनुषा जिल्लामै रहने प्रावधान छ,” उपकुलपति यादवले भने, “तर, प्रक्रिया ढिलो भएकोले भवन निर्माण सुरु गर्न सकिएको छैन।”
