काठमाडौं,२२ असार । देशभर मनसुनको प्रभाव सक्रिय भइरहेका बेला आज र भोलि केही स्थानहरूमा भारी वर्षाको सम्भावना रहेको जल तथा मौसम विज्ञान विभागले जनाएको छ।
विभागको मौसम पूर्वानुमान महाशाखाले आज बिहान सार्वजनिक गरेको बुलेटिनअनुसार कोशी प्रदेश र बागमती प्रदेशका पहाडी भू–भागका एक–दुई स्थानहरूमा भारी वर्षा हुन सक्ने अनुमान गरिएको छ।
त्यस्तै, कोशी, बागमती, गण्डकी र सुदूरपश्चिम प्रदेशका केही स्थानहरूमा र अन्य प्रदेशका थोरै भू–भागमा मेघगर्जन, चट्याङसहित मध्यम वर्षाको सम्भावना छ। उच्च पहाडी तथा हिमाली भू–भागहरूमा हल्कादेखि मध्यम वर्षा वा हिमपातको अवस्था देखिएको छ।
आज रातिको समयमा मौसम अझ बढी सक्रिय रहने अनुमान गरिएको छ। बागमती, गण्डकी, लुम्बिनी, कर्णाली र सुदूरपश्चिम प्रदेशका धेरैजसो स्थानहरूमा मध्यम वर्षा हुने सम्भावना रहेको छ। साथै, गण्डकी, कर्णाली, सुदूरपश्चिमका केही भू–भाग तथा कोशी, बागमती र लुम्बिनीका एक–दुई स्थानमा भारीदेखि अति भारी वर्षा हुन सक्ने चेतावनी दिइएको छ।
भोलि सोमबार पनि कोशी र बागमती प्रदेशका पहाडी क्षेत्रहरूमा भारी वर्षाको सम्भावना यथावत रहने महाशाखाले जनाएको छ।
विभागले बाढी, पहिरो र यातायात अवरोधको सम्भावना रहेकाले आवश्यक सतर्कता अपनाउन सर्वसाधारण र सम्बन्धित निकायहरूलाई आग्रह गरेको छ।
