काठमाडौं,३१ असार । नेपालमा सक्रिय मनसुनका कारण आज कोशी, बागमती, गण्डकी र लुम्बिनी प्रदेशका केही स्थानमा भारी वर्षा हुने सम्भावना रहेको मौसम पूर्वानुमान महाशाखाले जनाएको छ।
महाशाखाका अनुसार हाल मनसुनको न्यून चापीय रेखा पश्चिममा सरदर स्थानको आसपास र पूर्वमा सामान्यभन्दा केही उत्तरतर्फ सक्रिय छ। यसका कारण आज दिउँसो देशभर आंशिकदेखि पूर्ण बदली रहनेछ। कोशी, बागमती, गण्डकी र लुम्बिनीसहित पहाडी भूभागका धेरै ठाउँमा मेघगर्जन, चट्याङसहित हल्कादेखि मध्यम वर्षा हुने सम्भावना रहेको छ।
त्यसैगरी, उच्च पहाडी र हिमाली भेगका केही स्थानमा आज हल्कादेखि मध्यम वर्षा र हिमपात हुन सक्ने पूर्वानुमान गरिएको छ। राति पनि देशभर आंशिकदेखि पूर्ण बदली रहनेछ भने कोशी, गण्डकी, लुम्बिनी र कर्णाली प्रदेशका केही स्थानमा भारी वर्षा हुन सक्ने महाशाखाले जनाएको छ।
यस्तै, कोशी प्रदेशका तराई क्षेत्र र मधेश प्रदेशका केही स्थानमा हुरीबताससहित वर्षाको सम्भावना रहेको जनाइएको छ। महाशाखाले नदी आसपास र पहिरो सम्भावित क्षेत्रका बासिन्दालाई सतर्क रहन अनुरोध गरेको छ।
