काठमाडौं,०३ साउन । कानुन, न्याय तथा संसदीय मन्त्रालयले सङ्क्रमणकालीन न्यायसम्बन्धी ऐनअनुसार आवश्यक नियमावली छिटो तयार गर्ने तयारी थालेको छ । यसअघिको नियमावली नबनेका कारण सत्य निरूपण तथा मेलमिलाप आयोग र बेपत्ता व्यक्तिको छानबिन आयोगले आफ्नो कार्य द्रुत गतिमा अघि बढाउन सकेका थिएनन् ।
मन्त्रालयका अनुसार, आयोगका पदाधिकारीहरू तोकिएपछि पनि ऐनअनुसारको नियमावली नहुँदा समस्या देखिएको थियो । कानुन मन्त्री अजयकुमार चौरसियाले भने, “सङ्क्रमणकालीन न्यायलाई प्रभावकारी बनाउन हामी नियमावली तयार गर्ने काममा तीव्रता दिइरहेका छौं ।”
यसैगरी, बेपत्ता व्यक्तिको छानबिन, सत्य निरूपण तथा मेलमिलाप आयोग तेस्रो संशोधन ऐन, २०८१ को कार्यान्वयन समेत प्रभावकारी बनाउन नियमावलीको मस्यौदा तयार भइसकेको छ । मन्त्रालयले विगत आर्थिक वर्षमा विधेयक, नियमावली, अध्यादेश, निर्देशिका, कार्यविधि लगायतका कानुनी दस्तावेजहरू तर्जुमा गरी पारित गराउने कार्यमा समेत जोड दिएको छ ।
कानुन मन्त्रालयले कानुन तर्जुमालाई अझ प्रभावकारी र अन्तर्राष्ट्रिय मापदण्डअनुसार बनाउन अध्ययन पनि गरिसकेको छ । यसैबीच, विभिन्न विधेयकहरू पनि संसदमा छलफलको प्रक्रियामा छन् जसले नेपालका कानुनी प्रणालीलाई थप सुदृढ बनाउने विश्वास व्यक्त गरिएको छ । कानुनमन्त्री चौरसियाले थपे, “हामीले न्यायसम्बन्धी काममा सबै तहमा कानुनी सचेतना अभिवृद्धि गर्ने कार्यमा पनि जोड दिएका छौं जसले मुलुकमा न्यायपालिका मजबुत बनाउने छ ।”
