काठमाडौं,१० भदाैं – पूर्वप्रधानमन्त्री तथा नेकपा (एकीकृत समाजवादी) का अध्यक्ष माधवकुमार नेपाल माइतीघर मण्डला पुगेर उखु किसानसँगै धर्नामा बसेका छन् ।
उखु किसानहरूको आन्दोलनलाई ऐक्यबद्धता जनाउन उनी मंगलबार माइतीघर पुगेका हुन् । यसअघि आजै पूर्वप्रधानमन्त्री एवं समाजवादी (नयाँ शक्ति) पार्टीका अध्यक्ष डा. बाबुराम भट्टराई र नेकपा (माओवादी केन्द्र) का वरिष्ठ उपाध्यक्ष नारायणकाजी श्रेष्ठले पनि किसानको आन्दोलनलाई समर्थन गरेका थिए ।
सरकारले तोकेको अनुदान रकम नपाएको भन्दै किसानहरूले आइतबारदेखि निरन्तर प्रदर्शन गरिरहेका छन् ।
बजेट अभाव देखाउँदै सरकारले उखु किसानलाई दिँदै आएको प्रतिक्विन्टल ७० रुपैयाँ अनुदानलाई घटाएर ३५ रुपैयाँ मात्र दिने निर्णय गरेपछि किसानहरू आन्दोलित भएका हुन् ।
सोमबार किसानहरूले उखु बोकेरै प्रदर्शनमा सहभागी भएर आफ्नो विरोध जनाएका थिए । उनीहरूले अनुदान घटाउने निर्णय खारेज गर्न माग गरेका छन् ।
उखु उत्पादक महासङ्घको अगुवाइमा भइरहेको आन्दोलन काठमाडौं केन्द्रित भए पनि सिरहा, महोत्तरी, सर्लाही, रौतहट, बारा, पर्सा र नवलपरासीका किसानहरू समेत सहभागी भएका छन् ।
किसानहरूको माग अनुसार सरकारले पुरानै व्यवस्था अनुसार प्रतिक्विन्टलमा ७० रुपैयाँ कै दरले अनुदान कार्यान्वयन गर्नुपर्ने देखिएको छ ।
