झापा,११ भदाै। पूर्व–पश्चिम राजमार्ग अन्तर्गत कनकाई–८ स्थित बिरिङ खोला पुलमा पिकअप र मारुती भ्यान ठोक्किँदा एक जनाको मृत्यु भएको छ भने चार जना घाइते भएका छन् ।
गए राति करिब पौने ९ बजेतिर सुरुंगाबाट बिर्तामोडतर्फ जाँदै गरेको मे १ च ५४४६ नम्बरको पिकअप र विपरीत दिशाबाट आएको मे १ च ३४४० नम्बरको भ्यान आपसमा ठोक्किँदा दुर्घटना भएको हो ।
दुर्घटनामा भ्यान चालक गम्भीर घाइते भई उपचारका लागि बिर्तामोडस्थित बीएन्डसी अस्पताल पुर्याउनासाथ चिकित्सकले मृत घोषणा गरेका हुन्। मृतकको पूर्ण पहिचान खुल्न बाँकी रहेको प्रहरीले जनाएको छ।
सोही भ्यानमा सवार शिवसताक्षी–७ निवासी पृथ्वीनाथ शाह , उनकी पत्नी पुनमदेवी शाह , छोरा प्रसन्न शाह र छोरी प्रिन्सा शाह घाइते भएका छन्। उनीहरू हाल बीएन्डसी अस्पतालमै उपचाररत छन्।
पिकअप चालक धनकुटा महालक्ष्मी नगरपालिका–८ का सुमन पौडेल लाई प्रहरीले नियन्त्रणमा लिएर अनुसन्धान सुरु गरेको छ। दुर्घटनाको कारणबारे प्रहरीले थप अनुसन्धान गरिरहेको छ।
