काठमाडौं,१३ भदौ । मधेश प्रदेशका पूर्व प्रदेश प्रमुख राजेश अहिराज (राजेश झा) लाई पुर्पक्षका लागि थुनामा पठाउने काठमाडौं जिल्ला अदालतको निर्णयलाई उच्च अदालत पाटनले समेत सदर गरेको छ।
मुख्य न्यायाधीश लालबहादुर कुँवर र न्यायाधीश खडानन्द तिवारीको इजलासले जिल्ला अदालतको आदेशलाई यथावत् राख्दै अहिराजलाई कारागारमा राखेर अनुसन्धान अघि बढाउन अनुमति दिएको हो।
अहिराजलाई गत ४ साउनमा पक्राउ गरिएको थियो। ९ दिनको प्रहरी अनुसन्धानपछि सरकारी वकिलको कार्यालयले १४ साउनमा काठमाडौं जिल्ला अदालतमा बलात्कार मुद्दा दर्ता गरेको थियो। त्यसपछि अदालतले उनलाई डिल्लीबजार कारागार चलान गर्ने आदेश जारी गरेको हो।
उनीमाथि ४ जेठ २०८१ मा काठमाडौंको नयाँ बानेश्वरस्थित डेरामा एक युवतीमाथि बलात्कार गरेको आरोप लागेको छ। अहिराजले भने आरोप अस्वीकार गर्दै उल्टै जाहेरी दिने युवतीविरुद्ध पनि मुद्दा दायर गरेका छन्।
अहिराज, जो मधेश प्रदेशको पहिलो प्रदेश प्रमुख समेत भएका थिए, हाल कारागारमा पुर्पक्षका लागि थुनामा रहेका छन्।
