काठमाडौं । दशैं आउन अब एक महिना पनि बाँकी नहुँदा काठमाडौं उपत्यकालगायत विभिन्न स्थानबाट आफ्नो थलो फर्किनेका लागि खुलाइने सार्वजनिक यातायातको अग्रिम टिकट बुकिङ अनिश्चितजस्तै देखिएको छ ।
असोज ६ गते बाट घटस्थापना सुरु हुँदै छ तर, आइतबार ९भदौ १५० बिहानसम्म सरोकारवालाहरु अग्रिम टिकट बुकिङ खुला गर्ने विषयमा छलफलमा समेत भएके छैन।
दशैंका बेला मात्र काठमाडौं उपत्यकाबाट १० औँ लाख मानिस आफ्नो थातथलो फर्र्किन्छन् । तर, सरकार र यातायाता व्यवसायी हालसम्म अग्रिम टिकट बुकिङ खुला गर्ने विषयमा छलफलमा समेत जुटेका छैनन् ।
यस विषयमा छलफल गर्न हालसम्म आफूहरूलाई औपचारिक जानकारी नआएको नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाले जानकारी दिए । ‘अग्रिम टिकट बुकिङ खुला गर्ने विषयमा हालसम्म सरकारबाट औपचारिक रुपमा छलफल बोलाइएको छैन,’ उनले सूत्र न्युजलाई भने ।
तर, छलफलका लागि आफूहरुले बोलाएको र यातायात व्यवसायीले समय निकाल्न नसकेको यातायात व्यवस्था विभागका सूचना अधिकारी गणेशमान सिं राईले बताए । ‘अग्रिम टिकट खुलाउने विषयमा सरोकारवालालाई बोलाएका छौँ । उहाँहरुले समय निकाल्न सक्नु भएको छैन,’ उनले जानकारी दिए ।
सरोकारवाला निकायबिच छलफल नहुँदा अग्रिम टिकट बुकिङ खुला अनिश्चित देखिएको छ । तर, विभाग चाँडै नै छलफल गरेर टुंगोमा पुग्ने दाबी गर्छ । ‘हामी चाँडै नै सरोकारवालासँग छलफल गरेर टुंगो पुग्छौँ,’ विभागका सूचना अधिकारी राईले भने । उनका अनुसार चाँडै भनेको एक दुई दिनमै यातायात व्यवसायीसहित सरोकारवालासँग छलफल हुनेछ ।
अग्रिम टिकट बुकिङ खुला हुन ढिलो भए पनि यात्रुलाई आफूहरूले गन्तव्यमा पुर्याउने नेपाल यातायात व्यवसायी राष्ट्रिय महासंघको उपाध्यक्ष सिटौलाले बताए । ‘टिकट खुला हुन ढिलो भए पनि हामी यात्रुलाई गन्तव्यमा पुर्याउनेछौँ,’ उनले भने ।
तर, यसका लागि सरकारले मनसुनका कारण बिग्रिएका बाटो मर्मत गर्नुपर्ने उनको भनाइ छ । हाल मनसुन पनि सक्रिय भएकाले अग्रिम टिकट बुकिङ खुला गरिन हाल्न पनि समस्या देखिएको उनको भनाइ छ । यद्यपि, सबै सरोकारवाला पक्ष बसेर एउटा टुंगोमा पुगिने उनको विश्वास छ ।
