काठमाडौं,१८ भदौ । नेकपा (माओवादी केन्द्र) का सांसद जनार्दन शर्माले स्वास्थ्य मन्त्रालयले जारी गरेको एकीकृत एम्बुलेन्स सञ्चालन कार्यविधिका कारण बिरामीले आवश्यक सेवा पाउन कठिन भएको बताएका छन्।
बुधबारको प्रतिनिधिसभा बैठकमा सांसद शर्माले भने कि नियमित रूपमा सञ्चालन हुँदै आएको एम्बुलेन्स सेवा अचानक अवरुद्ध हुँदा असहज अवस्था सिर्जना भएको छ।
“स्वास्थ्य मन्त्रालयले एकीकृत एम्बुलेन्स सञ्चालन कार्यविधि जारी गरेको छ। यसले परोपकारी संस्था, स्थानीय सरकार र अन्य निकायहरूले एम्बुलेन्स सेवा सञ्चालन गर्न रोक लगाएको छ। लामो समयदेखि नियमित रूपमा सञ्चालन भइरहेका एम्बुलेन्सहरू अब सेवा दिन सकेका छैनन्, विशेषगरी दुरदराज क्षेत्रमा,” उनले भने।
सांसद शर्माले कार्यविधिले सञ्चालन योग्य एम्बुलेन्सहरूलाई समेत रोक लगाउँदा अनावश्यक आयातको प्रोत्साहन भएको बताएका छन्। “तीन हजारभन्दा बढी एम्बुलेन्स प्रयोगविहीन थन्किएका छन्। चालकहरू बेरोजगार भएका छन्। यसरी सञ्चालन योग्य एम्बुलेन्सलाई रोक लगाउनु अनावश्यक आयातको प्रोत्साहन गर्नेजस्तो देखिन्छ।”
उनले चेतावनी दिँदै भने कि जताततै आन्दोलन भइरहँदा एम्बुलेन्स संचालकहरू पनि आन्दोलनमा सामेल हुन सक्ने अवस्था छ।
