काठमाडौँ,१९ भदौ । नक्कली दुर्घटना देखाएर बीमा रकम हत्याउन खोज्ने गिरोहका ६ जना व्यक्तिलाई प्रहरीले पक्राउ गरेको छ। पक्राउ पर्नेमा ललितपुर, काठमाडौं, सर्लाही, काभ्रे र बाराका व्यक्तिहरू रहेका छन्।
जिल्ला प्रहरी परिसर काठमाडौंको टोलीले पक्राउ गरेका व्यक्तिहरूमा ललितपुर गोदावरी–१४ का ३६ वर्षीय सुनिल महर्जन र ३३ वर्षीय विकेश कुँवर, काठमाडौं महानगर–१२ का ५१ वर्षीय विनोद डंगोल, सर्लाही ईश्वरपुर–३ का ३९ वर्षीय सुनिल सापकोटा, काभ्रे पाँचखाल–२ का ४८ वर्षीय हरिप्रसाद गौतम र बाराको निजगढ–६ का ४५ वर्षीय मनोजकुमार आचार्य छन्।
परिसरका एसपी तथा प्रवक्ता अपिलराज बोहराका अनुसार पक्राउ परेकाले नक्कली दुर्घटना र घाइतेको नाटक गर्दै सरकारी कार्यालयका नक्कली कागजात र छाप तयार गरेका थिए। उनीहरूले बी एन्ड बी अस्पतालमा उपचार गराएको भन्ने नक्कली प्रमाणपत्र समेत बनाएर नेपाल माइक्रो इन्सुरेन्स कम्पनीबाट बीमा रकम दाबी गरेको प्रारम्भिक अनुसन्धानमा खुल्न आएको छ।
उनीहरूविरुद्ध लिखत सम्बन्धी कसुरमा काठमाडौं जिल्ला अदालतबाट ५ दिनको म्याद लिई अनुसन्धान भइरहेको प्रहरीले जनाएको छ।
