काठमाडौँ,१९ भदौ । सरकारले सूचीकरणमा नआएका सामाजिक सञ्जाललाई नेपालभित्र क्रमशः बन्द गर्ने निर्णय गरेको छ। सूचना तथा सञ्चार प्रविधि मन्त्रालयले सर्वोच्च अदालतको आदेशअनुसार यो निर्णय कार्यान्वयन गर्न लागिएको जनाएको छ।
मन्त्रालयले जारी गरेको विज्ञप्तिमा भनिएको छ, “सूचीकृत नभएका प्लेटफर्मलाई नेपालभर प्रयोगमा रोक लगाइनेछ। तर, सूचीकरण भएपछि ती सामाजिक सञ्जाल तत्काल पुनः सञ्चालनमा आउनेछन्।”
सरकारले २०८२ भदौ ९ गते बसेको मन्त्रिपरिषद् बैठकमार्फत एक साताभित्र सामाजिक सञ्जाल सूचीकरण गर्न निर्देशन दिएको थियो। तर तोकिएको समयसीमा बुधबार रातिदेखि सकिँदासमेत प्रमुख प्लेटफर्महरूले दर्ता प्रक्रिया पूरा नगरेपछि मन्त्रालयले बिहीबार पुनः मन्त्रीस्तरीय निर्णय गर्दै निषेधाज्ञा लागू गर्ने कदम चालेको हो।
यससँगै नेपालमा सूचीकरण नगरेका सामाजिक सञ्जालहरू चल्न पाउने छैनन्।
