जनकपुरधाम,१९ भदौ । महोत्तरीको पिपरा गाउँपालिका ६ रतौलीस्थित आदर्श माध्यमिक विद्यालयमा दिउँसो खाजामा छेपारो परेको घटनापछि ६० बालबालिका निगरानीका लागि अस्पताल भर्ना भएका छन्।
विद्यालय व्यवस्थापन समिति अध्यक्ष ओमप्रकाश महतोका अनुसार आज दिउँसो एक बालकको प्लेटमा दिइएको खाजामा छेपारो परेको थियो। उक्त बालकले घटना देखेपछि खाजा फालेर घर फर्केर अभिभावकलाई जानकारी दिएका थिए।
अभिभावक र विद्यालयले तत्कालै खाजा खाएका सबै बालबालिकालाई प्रादेशिक अस्पताल जनकपुरमा ल्याएर निगरानीमा राखेका हुन्। महतोका अनुसार कुनै बालबालिकामा समस्या भने देखिएको छैन, तर सुरक्षा कारणले अस्पतालमा राखिएको हो।
प्रादेशिक अस्पताल जनकपुरका आकस्मिक कक्ष इन्चार्ज शरद यादवले पनि बालबालिकामा कुनै स्वास्थ्य समस्या नदेखिएको जानकारी दिएका छन्। उनका अनुसार अभिभावकहरूको चिन्ता कम गर्न बालबालिकालाई अस्पतालमा राखिएको हो।
