सुनसरी,२० भदाै । सुनसरीस्थित झुम्का कारागारमा स्वास्थ्य समस्या चर्किएपछि १३ जना कैदीबन्दीलाई बिहीबार धरानस्थित बीपी कोइराला स्वास्थ्य विज्ञान प्रतिष्ठान पठाइएको छ। चार दिनमै तीन कैदीबन्दीको मृत्यु भइसकेपछि कारागार प्रशासनमा त्रास फैलिएको छ।
बुधबार अचानक बेहोस भएका सप्तरी राजविराज–८ का ४६ वर्षीय जलेश्वर यादवको जिल्ला अस्पताल इनरुवामा उपचारका क्रममा ज्यान गएको हो। उनलाई केही दिनदेखि उच्च ज्वरो आएको थियो।
यसअघि सोमबार सुनसरी गढी गाउँपालिका–६ का ४८ वर्षीय रामदेव उराव र धरानका २४ वर्षीय सागर राईको पनि मृत्यु भएको थियो। दुवैलाई श्वासप्रश्वासमा समस्या देखिएपछि बीपी प्रतिष्ठानमा उपचारका लागि लगिएको थियो।
निमित्त कारागार प्रमुख राम निरौलाका अनुसार मृतकहरूमा ज्वरो, श्वासप्रश्वासमा समस्या र वान्ता हुने लक्षण देखिएको थियो। घटनापछि बुधबार कारागारमै स्वास्थ्य शिविर सञ्चालन गरिएको छ।
सुनसरीका एसपी सुमन तिम्सिनाले दुवै ब्लकका कैदीबन्दीको स्वास्थ्य परीक्षणपछि मात्र रोगको ठ्याक्कै कारण पत्ता लाग्ने बताए। चिकित्सकहरूले भाइरल ज्वरोको आशंका गरे पनि आत्तिनुपर्ने अवस्था नरहेको जनाइएको छ।
क्षमता १ हजार ६ सय रहेको झुम्का कारागारमा हाल १ हजार ७९५ जना कैदीबन्दी रहेका छन्। बिरामी बढी देखिएका कैदी ‘बी’ ब्लकमा बस्नेहरू भएको प्रशासनले जनाएको छ।
