काठमाडौं, २५ भदौ । सुन्धारास्थित केन्द्रीय कारागारबाट करिब ३३ सय कैदीबन्दी फरार भएका छन् । कारागारमा ३८ सय कैदीबन्दी रहेकोमा हाल करिब ५ सयकै हाराहारीमा मात्र रहेका छन् ।
स्रोतका अनुसार भद्रबन्दी गृहमा करिब १००, महिला बन्दी गृहमा करिब १००, र सेन्ट्रल कारागारमा करिब ३०० कैदीबन्दी मात्रै रहेका छन् । भद्रबन्दी गृहबाट नक्कली भुटानी शरणार्थी प्रकरणमा पुर्पक्षका लागि थुनिएका टोपबहादुर रायमाझी समेत फरार भएका छन् ।
भागेका केही कैदीबन्दी भने कारागार फर्किन सुरु गरेका छन् । अहिलेसम्म करिब ५० जना फर्किसकेका छन् भने अरू केही पनि फर्कने क्रममा रहेको स्रोतले जनाएको छ ।
सुरक्षा स्रोतका अनुसार, नख्खु कारागारबाट निस्केका कैदीबन्दीहरू राति करिब १० बजे सुन्धारा कारागारमा तोडफोड गरेका थिए । त्यसपछि सुरक्षामा खटिएको नेपाल प्रहरी कारागारबाट बाहिर निस्किएर आर्मी हेडक्वार्टर पुगेको थियो । नेपाली सेना त्यसपछि मात्र कारागारमा पुगेको थियो, त्यसअघि नै करिब ३३ सय कैदी फरार भइसकेको थियो ।
