काठमाडौँ, २५ भदौ । जेनजी आन्दोलनका प्रतिनिधिहरू बुधबार नेपाली सेनाको मुख्यालय जंगीअड्डा पुगेका छन्, राष्ट्रपति रामचन्द्र पौडेलको संवाद आह्वानअनुसार। सोमबार–मंगलबारको हिंसात्मक घटनापछि सिर्जित परिस्थितिमा संवादको पहलको रूपमा यो भेट भएको हो।
सैनिक स्रोतका अनुसार जेनजीका १५–१६ जना प्रतिनिधि प्रारम्भिक रुपमा प्रधानसेनापति अशोकराज सिग्देलसँग भेटे। तर, प्रतिनिधिको संख्या बढी देखिएपछि सिग्देलले सबै समूह पहिले एकमत भएर वार्ताको टेबलमा बस्न तयार हुन आग्रह गरेका छन्। “यो विषम परिस्थितिमा सबै पक्षको आवाज समेटेर वार्ता अघि बढाउनुपर्छ,” सिग्देलले भनेका छन्।
जंगीअड्डाभित्र अहिले जेनजी प्रतिनिधिहरू छुट्टै छलफलमा जुटेका छन् र संवादका लागि एकजना संयोजक तोक्न निर्देशन दिइएको छ। प्रारम्भिक छलफलको निष्कर्ष आएपछि मात्र राष्ट्रपतिको उपस्थितिमा औपचारिक वार्ता हुने सैनिक स्रोतले जानकारी दिएका छन्।
यसअघि राष्ट्रपति कार्यालयले मंगलबार विज्ञप्ति जारी गर्दै जेनजी प्रदर्शनकारीलाई संयमित रहन र संवादमार्फत समस्या समाधान गर्न आह्वान गरेको थियो। “लोकतन्त्रमा नागरिकको माग वार्ता र संवादमार्फत समाधान गर्न सकिन्छ, त्यसैले सबै पक्षलाई संयमित हुन अपिल गर्दछु,” विज्ञप्तिमा उल्लेख थियो।
जेनजी युवा समूहले भ्रष्टाचार विरोधी ‘नेपोबेविज’ अभियानमा सक्रिय रहँदै सामाजिक सञ्जालमा आक्रोश व्यक्त गरेका थिए। सरकारले फेसबुक, एक्ससहित २५ सामाजिक सञ्जालमा प्रतिबन्ध लगाएपछि सडक प्रदर्शन सुरु भएको थियो। सोमबारको प्रदर्शनमा प्रहरीको बल प्रयोगका कारण कम्तिमा १९ जना मृत्यु भएका र २०० भन्दा बढी घाइते भएका थिए।
मंगलबार प्रशासनिक कर्फ्यूको बाबजुद प्रदर्शनकारीहरूले सुरक्षा घेरा तोड्दै बानेश्वरस्थित संसद् भवनमा प्रवेश गरेका थिए। संसद् भवनमा आगजनीपछि जेनजी युवा अन्यत्र प्रस्थान गरेका थिए। त्यसपछि सिंहदरबार, सर्वोच्च अदालत लगायतका प्रशासनिक केन्द्रमा पनि आगजनी र तोडफोडको घटना देखिएको थियो।
सैनिक सूचना तथा जनसम्पर्क निर्देशनालयले नागरिकलाई ऐतिहासिक, सांस्कृतिक, पुरातात्विक र राष्ट्रिय सम्पत्ति सुरक्षित राख्न सबैको साझा जिम्मेवारी भएको स्मरण गराएको छ।
