काठमाडौं,०२ असोज । मनसुनको न्यून चापीय रेखा सरदर स्थान आसपास रहेकाले आज देशका विभिन्न भागमा वर्षाको सम्भावना रहेको मौसम पूर्वानुमान महाशाखाले जनाएको छ। अरब सागर र बंगालको खाडीबाट प्रवेश गरेको जलवाष्पयुक्त हावाले समेत मौसममा प्रभाव पारेको छ।
महाशाखाका अनुसार आज दिउँसो देशभर सामान्यतया बदली रहनेछ। कोशी, बागमती, गण्डकी, लुम्बिनी र सुदूरपश्चिम प्रदेशका केही स्थानमा मध्यम वर्षा हुने सम्भावना छ। साथै कोशी, मधेस, बागमती, लुम्बिनी र सुदूरपश्चिम प्रदेशका पहाडी तथा तराई भूभागका एक–दुई स्थानमा भारी वर्षा हुन सक्ने पूर्वानुमान गरिएको छ।
आज राति पनि देशभर सामान्य बदली रहनेछ। कोशी, मधेस, बागमती, गण्डकी र लुम्बिनी प्रदेशका केही स्थानमा मध्यम वर्षा र कतिपय स्थानमा भारी वर्षा हुने सम्भावना रहेकोले महाशाखाले आवश्यक सतर्कता अपनाउन आग्रह गरेको छ।
