काठमाडौं,०२ असाेज । जनमत पार्टीका ६ शीर्ष नेताहरूले नेतृत्वप्रति असन्तुष्टि जनाउँदै पार्टीबाट सामूहिक राजीनामा दिएका छन्। उनीहरूले आजैदेखि साधारण सदस्यसमेत नरहने घोषणा गरेका हुन्।
राजीनामा दिने नेताहरूमा वरिष्ठ उपाध्यक्ष अब्दुल खान, केन्द्रीय प्रवक्ता डा. शरत सिंह यादव, जनमत युवा सङ्घका केन्द्रीय संयोजक सञ्जय कुमार यादव, जनमत स्वास्थ्यकर्मी सङ्घका संयोजक सी.के. सिंह, सुदूरपश्चिम प्रदेशका वरिष्ठ इन्चार्ज राजाराम चौधरी र केन्द्रीय सदस्यसहित राष्ट्रिय परिषद् सदस्य विक्रम बहादुर बम रहेका छन्।
अध्यक्ष सिके राउतलाई सम्बोधन गरी पठाइएको पत्रमा उनीहरूले पार्टी नेतृत्वले देशको विषम परिस्थितिलाई बेवास्ता गरेको र जनमानसअनुरूप आत्मालोचना तथा नेतृत्व परिवर्तन गर्न अस्वीकार गरेको आरोप लगाएका छन्।
पत्रमा भनिएको छ, “हामीले नेतृत्व परिवर्तनको माग गर्दा त्यसलाई अवहेलना गर्दै उल्टै फेसबुकमार्फत अंहकारपूर्ण शैलीमा धारणा सार्वजनिक गरिएको छ। यसले जेनजी पुस्ताले बगाएको रगतको अपमान भएको महसुस गरेका छौं।”
राजीनामा दिएका नेताहरूले आफूहरू पद–स्वार्थका लागि नभई नयाँ पुस्ताको चाहनाअनुरूप जेनजी पुस्ताकै नेतृत्वमा सहकार्य गर्ने प्रतिबद्धता जनाएका छन्।
यी नेताहरूले अध्यक्ष राउतलाई २४ घण्टाभित्र राजीनामा दिन अल्टिमेटम दिएका थिए। तर, राउतले उल्टै असन्तुष्ट नेताहरूमै राजीनामा दिन दबाब दिएपछि उनीहरूले सामूहिक रूपमा पार्टी त्यागेका हुन्।
