बाराको परवानीपुर गाउँपालिकास्थित हेटौडा ग्रिडअन्तर्गतको १३२ केभी सबस्टेशनमा बुधबार दिउँसो आगलागी भएपछि अवरुद्ध भएको वीरगञ्ज र आसपास क्षेत्रको विद्युत् आपूर्ति बिहीबार बिहान पुनः सुचारु भए पनि केही घण्टामै फेरि बन्द भएको छ।
नेपाल विद्युत् प्राधिकरण वीरगञ्ज वितरण केन्द्रका प्रमुख अवधेश कुमार दूबेका अनुसार १३२ केभीए ब्रेकरको ‘बुस’ फुट्दा आपूर्ति पुनः अवरुद्ध भएको हो। उनका अनुसार प्रसौनी सबस्टेशनमार्फत अस्थायी रूपमा आपूर्ति गर्ने प्रयास भइरहेको भए पनि प्राविधिक जटिलताका कारण कहिले पूर्ण रूपमा सेवा नियमित हुन्छ भन्ने यकिन छैन।
बुधबार दिउँसो ४ बजे ११ केभी प्यानलमा सर्टसर्किट भई आगलागी हुँदा सिमरा, कृषि, गण्डक, डाबर, नारायणी, हिमाल, परवानीपुर, जगदम्बा, वीरगञ्ज, नितनपुर, चोर्नी र भलुही फिडरसहित सबै क्षेत्रमा आपूर्ति पूर्ण रूपमा बन्द भएको थियो। आगलागीलाई वरुण यन्त्र, स्थानीय प्रहरी र सर्वसाधारणले नियन्त्रणमा लिएका थिए।
लगातारको विद्युत् अवरोधले औद्योगिक क्षेत्रदेखि व्यापारीक र दैनिक जीवनसम्म ठूलो असर परेको छ। स्थानीयले प्राधिकरणको ढिलासुस्तीप्रति आक्रोश व्यक्त गर्दै छिटो मर्मत र दीर्घकालीन समाधानको माग गरेका छन्।
प्राधिकरणले भने मर्मत कार्यलाई तीव्र बनाएको र सकेसम्म चाँडै सेवा पुनः सुचारु गर्ने प्रतिबद्धता जनाएको छ।
