काठमाडौं,०३ असोज । दैलेखको डुङ्गेश्वर गाउँपालिकाका लेखा अधिकृत टंकबहादुर कार्की एक लाख रुपैयाँ घुससहित पक्राउ परेका छन्। अख्तियार दुरुपयोग अनुसन्धान आयोग टंगाल र सुर्खेतस्थित संयुक्त टोलीले उनलाई सोमबार नियन्त्रणमा लिएको हो।
कार्कीले सडक स्तरोन्नति तथा निर्माण कार्य सम्पन्न भएपछि बिल भुक्तानीका लागि सेवा लिने पक्षसँग एक लाख रुपैयाँ घुस मागेको अख्तियारले जनाएको छ। सोही सूचनाको आधारमा अख्तियारको टोलीले निगरानी गरी उनलाई रंगेहात पक्राउ गरेको हो।
अख्तियारका अनुसार कार्कीविरुद्ध आवश्यक कानुनी प्रक्रिया अघि बढाइएको छ। यस घटनाले स्थानीय तहमा हुने भ्रष्टाचारविरुद्ध कडाइका साथ कारबाही भइरहेको सन्देश दिएको छ।
