काठमाडौं,०४ असोज । चितवनको इच्छाकामना गाउँपालिका–६ तुइन खोलामा गएराति खसेको पहिरोका कारण मुग्लिन–नारायणगढ सडक १७ घण्टादेखि दुईतर्फी बन्द भएको छ।
हिजो बेलुका सवा सात बजेतिर खसेको पहिरोले सडक पूर्ण रूपमा अवरुद्ध बनाएको हो। माथिबाट ढुङ्गा खस्ने क्रम रोकिएको नभएकाले तत्काल उपकरण खटाउन नसकिएको सडक डिभिजन कार्यालय भरतपुरले जनाएको छ। सुरक्षा जोखिमका कारण गएराति काम रोकिएको र आज दिनभर सडक खोल्न समय लाग्ने अनुमान गरिएको छ।
सडक बन्द हुँदा यात्रुहरू बीच बाटोमै अलपत्र परेका छन्। वैकल्पिक रूपमा पूर्वतर्फबाट आउने साना गाडीलाई हेटौँडा–कुलेखानी सडक प्रयोग गर्न र पश्चिमतर्फका गाडीलाई कालिगण्डकी करिडोरमार्ग प्रयोग गर्न आग्रह गरिएको छ।
