बीरगन्ज,०४ असोज । नेपाली काँग्रेसका केन्द्रीय सदस्य एवं पूर्वमन्त्री रमेश रिजालले जेन(जी) पुस्ताको माग र सहभागितालाई सम्बोधन गर्ने प्रतिबद्धता जनाएका छन्।
पार्टी मुख्यालय सानेपामा सञ्चारकर्मीहरूसँग कुरा गर्दै रिजालले हालैको आन्दोलनका क्रममा पार्टी संरचनामा भएको क्षतिप्रति खेद प्रकट गरे। उनले भने, “पार्टीमाथि भएको आक्रमण निन्दनीय छ, तर जेन(जी) पुस्ताको मागलाई सम्बोधन गर्न हामी गम्भीर छौँ।”
भदौ २३ र २४ गतेको आन्दोलनमा काँग्रेसको केन्द्रीय कार्यालयदेखि धेरै जिल्ला र प्रदेश कार्यालयहरू क्षतिग्रस्त भएका थिए। यस घटनापछि पार्टीभित्र नेतृत्व हस्तान्तरण र संरचनागत सुधारबारे बहस तीव्र बनेको छ।
रिजालले कार्यसम्पादन समितिको आगामी बैठकले विशेष महाधिवेशन गर्ने वा नगर्ने विषयमा छिट्टै निर्णय लिने बताए। उनले पार्टीलाई अझ गतिशील, समावेशी र युवामुखी बनाउन आवश्यक पहल गर्ने संकेत पनि गरे।
